Eigna- og skuldaregister.

Jæja, það kom að því að Doddi verði rekinn úr Svörtuloftum. Það hefur verið mikið sjónarspil í gangi undanfarið um hversu mikið hann reyndi að vara við því að allt væri á leið til fjandans, bréf send, á réttum pappír og frá réttum stað, mikið um fundarhöld sem erfitt er að henda reiður á. En semsagt, nú fer hann loksins karlinn.

Áddni tekur upp hreðjaklípur (átti hann þær ekki fyrir?) og getur nú stundað hrossakaup eins og honum er einum lagið.  Sumir setja upp eigna og skuldatal á síður sínar amk. þær sem lúta að heimilishaldi viðkomandi. Mikið svakalega væri gaman að skyggnast inn í bókhald sumra.

Bara tveir eftir í Frjálslynda, minn gamli félagi Grétar Mar og hver var aftur hinn?

Mitt eigna og skuldaregister er þannig vaxið að ég á ekki krónu lengur, allt sem ég hef unnið fyrir og sparað og klipið af til magra ára er fuðrað upp á verðbólgu, vaxta og verðbótabálinu. Langt fyrir neðan núllið. Þá vitið þið það. Þó ég seldi íbúðina fengi ég ekki upp í skuldirnar sem núna hvíla á eigninni. Eins og flestir aðrir landsmenn.  Ættjarðarfjötrar hétu þetta ástand einhvertíma. 

Annars hefur gigtin verið að drepa mig undanfarið þeas. á meðan frostið varði. Hef varla komist upp og niður þessar þrjár tröppur sem ég þarf að ganga til að komast inn og út. Veit að allir hafa beðið í ofvæni eftir skýringu á því hvað ég hef verið slöpp á blogginu. Staulast um eins og Grasagudda eða Jobbagunna sem við sandgerðingar þekktum sem börn.

Aðalástæðan er engu að síður aðallega sú að það væri að bera í bakkafullan lækinn að kommenta á það sem er að gerast á landinu bláa (bleika?). Það sjá aðrir um að hamra járnin svona rétt fyrir kosningar.

Talandi um kosningar þá var bloggvinkona mín að stinga upp á að við skiluðum kjörseðlum með áritunninni "Utanþingsstjórn" en engu Xi. Amk. veit ég ekki í dag hvert xið mitt fer ef það fer þá nokkuð. Nema auðvitað að hvorki  Sjálfgræðgis né Framapotaraflokkarnir fá það hjá mér. Xið sko. 

Jæja, nú er ég að verða klámfengin, best að fara að liðka stirða liðina og bóna geðið. Adios amigos.

 

Athugasemdir

[Sigrún Jónsdóttir, 26.2.2009 kl. 14:11]

Það sem ég var að hugsa um að gera var að pára UTANÞINGSSTJÓRN á kjörseðilinn.  Það er mikill munur á Þjóðstjórn og Utanþingsstjórn.  Þjóðstjórn skipa venjulega stjórnmálamenn allra flokka en Utanþingsstjórn skipa fagaðilar utan úr bæ

Annars er farið að glitta í nokkra traustvekjandi pólitíkusa svona innan um og saman með,,,bara ekki í mínu kjördæmi.

Vona að gigtarskömmin víki fyrir hækkandi sól og batnandi veðurfari

[Rut Sumarliðadóttir, 26.2.2009 kl. 14:40]

Auðvitað, takk, ég sé þetta núna, laga þetta með hraði ( var næstum búin að skrifa gra..) svona er hausinn þegar ég druslast á lappir eftir rúmlegu. Verkjalyfin gera lítið í því að skerpa hugsunina eins og þú sérð.

[Ingibjörg Friðriksdóttir, 26.2.2009 kl. 15:55]

Ljótt að heyra, þú væri ekki gjaldgeng á þing með þessar skuldir á herðunum.

En vertu dugleg að taka norskt hákarlalýsi við gigtinni.  það hressir og kætir.

[Rut Sumarliðadóttir, 26.2.2009 kl. 16:33]

Imba mín, tek þegar hákarlalýsi daglega. Þarf bara að komast í hita á þessum árstíma til að stytta veturinn en það árar illa eins og allir vita.

Nei ætli það eigi ekki einhverjir fasteignir sem telja hærra en mín og þín.

[Rut Sumarliðadóttir, 26.2.2009 kl. 21:58]

Kíki á þetta, takk.

Já, manstu eftir þeim hjónum. Hann vildi virkja jarðhitann og og nota til ræktunar en hann var bara talinn skrítinn hollendingurinn fljúgandi. Svona eins og sjómaðurinn fyrir vestan sem fékk sér utanborðsmótor og var sagður of latur til að róa. Eitthvað svo íslenskt.