Að borga eða borga ekki, það er spurningin.

Það er mikið rætt um það þessa dagana hvort beita eigi eina vopninu sem hinn almenni íslendingur á eftir; að borga ekki af lánum sínum. Held að flestir geri sér grein fyrir því að verði af því þá hrynur kerfið okkar, þarf ekki hagfræðimenntun til, ef ekkert kemur inn er ekki úr neinu að spila.

Okkur er boðið uppá frystingu, lengingu og annað í þeim dúr sem smá plástur. En það leysir engan vanda, frestar honum bara. Er sjálf að sækja um frystingu sem er gott eitt og sér en þegar henni lýkur verða afborganirnar hærri og til lengri tíma svo þá verð ég aftur komin í sömu spor og ég var í ef ekki verri. Ætli ég verði ekki komin hátt á tíræðisaldur til að klára dæmið. Það er einhver fúi í þessari skjaldborg.

Hvar er leiðréttingin okkar á "lánunum" sem við tókum? Ég vil afþakka alla ölmusu takk fyrir, ég vil leiðréttingu á stuldinum. Ég vil endilega fá aftur það sem af mér var tekið og ég vann hörðum höndum fyrir. Vil ekki fyrir náð og miskunn lengja í hengingarólinni sem auðvitað að lokum herðir að hálsinum og slekkur öll ljós.

Mér finnst það gleymast í umræðunni að það kemur að því að fólk borgar ekki, kannski ekki vegna borgaralegrar óhlýðni heldur einfaldlega vegna þess að það gengur fyrir að fæða sig og sína. Það er ekki spurning í mínum huga hvað er fremst í forgangsröðinni. Þetta er staðan sem allt of margir eru í núna. Fólk er fast í fátæktargildru. Það þarf heldur enga sérstaka hagfræðiþekkingu til að sjá þetta. Jafnvel svona meðaljóna eins og ég skilur þetta. 

Í guðs og allra góðra vætta nafni, þið sem við vorum að kjósa til valda, vaknið og áttið ykkur á stöðunni. Við getum ekki borgað lengur, þið verðið að fara að fatta dæmið. Það duga engir plástrar á ástandið. Það ætti að vera forgangsmál ykkar allra að eyða öllu púðri í að finna leið til að leiðrétta óréttlætið sem við lifum við. ESB má setja í frost í einhvern X tíma.  Það er ekki mál nr. 1 fyrir íslendinga.

 

Athugasemdir

[Sigrún Jónsdóttir, 6.5.2009 kl. 14:08]

Rut, ég er nokkurn vegin viss um að það er möguleiki á skuldaafskriftum ef farið er í greiðsluaðlögunarferlið, held bara að það hafi ekki komist almennilega til skila.  Gangi þér vel

[Rut Sumarliðadóttir, 6.5.2009 kl. 14:51]

Sæl og blessuð, jú, eitthvað hef ég heyrt um það en hversu mikið, miðað við hvaða tíma og hvaða upphæð og hverjir eiga rétt á þessu? Það vantar mikið uppá að við fáum upplýsingar um slíkt sé þetta til. Auglýsi hér með eftir þessum upplýsingum. Þurfti að standa í smá stappi til að fá frystingu vegna þess að ég var með svo háar tekjur! Það eru strípuð laun öryrkja sem var verið að vitna í.

[Soffía Valdimarsdóttir, 6.5.2009 kl. 16:13]

Já, andlegir tvíburar örugglega!

Leiðrétting er einmitt rétta orðið og til skrattast með þetta ESB bull núna strax. Þetta tekur alltof mikinn tíma og orku frá öðrum mikilvægari málum.

[Rut Sumarliðadóttir, 6.5.2009 kl. 17:23]

Nákvæmlega, leiðrétting en ekki ölmusur, takk fyrir takk! Ég er alveg á því að við eigum að íhuga að ganga í ESB en það er ekki það brýnasta núna. Sammála að þetta mál er of plássfrekt akkúrat núna. Leiðrétting á skuldum landsmanna er að mínu viti það sem er er mest aðkallandi.

[TARA, 8.5.2009 kl. 00:07]

Ég held ekki að það sé skynsamlegt að hætta að borga...það kemur bara í bakið á manni síðar.

[Rut Sumarliðadóttir, 8.5.2009 kl. 12:20]

Silla, það vil ég líka strax og við fáum að vita hvað við fáum og hvað við missum. Það vantar mikið upp á upplýsingar um þetta á mannamáli. Með greiðsluaðlögunina þá er þetta bara ekki nóg, það verður að leiðrétta og afskrifa hluta af skuldunum okkar annars endum við í því að aðeins örfáir verða eftir sem geta borgað og við getum ekki rekið sjoppuna lengi þannig. Mér finnst þetta svo kristaltært. Það er einmitt þetta sem verið er að vara við. Við hlustuðum ekki á viðvaranir fyrir hrunið, megum ekki við því að það gerist aftur.

[Rut Sumarliðadóttir, 8.5.2009 kl. 12:24]

Tara, ekki er ég að mæla með því. En haldi áfram sem horfir þá halda lánin áfram að hækka og allt annað að hækka líka, greiðslugetan minnkar dag frá degi og það eru margir svo illa staddir að þeir þura að velja um að borga af lánunum eða gefa börnum að borða. Ég er ekki í vafa um hvort ég veldi. Þegar svo illa er komið fyrir fólki, og það er svo illa komið fyrir margar fjölskyldur, gerist það að sjálfu sér að fólk borgar ekki. Það á einfaldlega ekki fyrir því.

[TARA, 8.5.2009 kl. 13:01]

ég veit...þetta er erfitt og skelfilegt fyrir marga...ég myndi líka frekar kaupa mat handa börnunum en borga af húsinu ef ég stæði í þeim sporum.

[Guðrún Emilía Guðnadóttir, 8.5.2009 kl. 13:07]

Rut mín frysting er bara frestur á vandamálinu, en við kannski neyðumst til að gera eitthvað. EITT VEIT ÉG AÐ ÞREYTT ER ÉG ORÐIN Á AÐ LIFA EKKI SÓMASAMLEGU LÍFI.  þannig að ég setti bankanum kosti eða ég hætti að borga get ekki meir, sér í lagi að því að þetta er út af öðrum sem við skuldum.
Nú er það bara harkan sex.
Knús til þín
Milla

[Rut Sumarliðadóttir, 8.5.2009 kl. 13:29]

Tara, ég veit að við skiljum hvora aðra.

Milla, svo sammála og einmitt það sem ég er að benda á og er hrædd um við séum að skella skollaeyrum við þessum viðvörunum. Frysting er engin lausn, bara frestur. Ég er sko líka þreytt á því að geta ekki lifað sómasamlegu lífi, að bara skrimta er ekki mannsæmandi. Flott útspil hjá ykkur með bankann. Hef sjálf lent í því að borga milljónir vegna annarra og hef það bara ekki í mér að byrja einu sinni enn frá grunni, allt of gömul og þreytt til þess. 

[Guðrún Emilía Guðnadóttir, 8.5.2009 kl. 15:06]

Þá skaltu bara ekki gera það Rutlan mín, lifðu lífinu fyrst og fremst.

[Ingibjörg Friðriksdóttir, 10.5.2009 kl. 18:27]

Efast ekki eitt einasta augnablik um að margir eru hjálpar þurfi, en ég veit það líka að það eru margir sem eru ekki viðbjargandi hvort sem það var fyrir eða eftir hrun.  Þetta hef ég séð, því það kom til mín maður sem hefur verið vanskilamaður alla tíð og ætlaði að fá samúð mína, þar sem ástandið væri ekki honum að kenna.  Hann fór vonsvikinn frá mér, enda enga samúð hjá mér að fá, því að ég er ekki enn búin að fá hestinn minn borgaðan sem ég seldi honum fyrir átján árum, en hann endurseldi með 70% hagnaði.

[Jakobína Ingunn Ólafsdóttir, 10.5.2009 kl. 19:17]

Megnið af úrlausnum ríkisstjórnarinnar miðar að því að láta almenning fjármagna bankanna.

Sáuð þið eitthvað í stjórnarsáttmálanum um að láta ræningjanna skila ránsfengnum?

Það er verið að láta fólk borga langt umfram það sem það upphaflega stofnaði til. Fólkið í landinu er að skila peningunum sem útrásarvíkingarnir geima á aflandseyjum.

[Anna Ragna Alexandersdóttir, 11.5.2009 kl. 13:49]

[Rut Sumarliðadóttir, 11.5.2009 kl. 13:54]

Imba, alltaf verið til svoleiðis fólk og verður eflaust áfram!

Bíbí, það verður að leiðrétta þessi mál, klár á að það verður engin "þjóðarsátt" öðruvísi. Bæði hvað varðar leiðréttingu almennings og svo því hvernig stjórnin gengur fram í að ná þessum peningum aftur.

Anna, svo sammála!

[Ingibjörg Friðriksdóttir, 11.5.2009 kl. 14:30]

Rut!

Eigum við ekki að bjóða okkur fram fyrir næstu kosningar?

[Rut Sumarliðadóttir, 11.5.2009 kl. 15:14]

Það þyrfti 10 tryllta og villta hesta til að draga mig í pólitík svona opinberlega. Fínt að láta gamminn geysa (svo ég haldi mig nú við myndlíkinguna) hérna á bloggin án allrar ábyrgðar!